Plantun de Prouvènço

Pèr coumpara dos planto d'encò nostre

Vicia lutea & Picea abies

Corso

Vicia lutea

Fabaceae Leguminosae

Àutri noum : Maucho, Corno-biòu, Cornabiòu.

Nom en français : Vesce jaune.

Descripcioun :
Lou corso es uno vesso pulèu coumuno que trachis à la primo dins li prado, lis ermas e li baragno. Li flour soun groupado de uno à tres e sènso pecou. Lis estipulo porton de glando bourdado de negre e pounchudo, que se vèson bèn (fotò). Se destrìo de Vicia hybrida, mai coumuno, que soun estendart èi pas pelous (fotò), au contro di dòusso (2 à 4 cm), subretout eici pèr la varieta hirta. Coumpara emé lou corno-biòu que ié sèmblo e qu'èi mai jauno.

Usanço :
Ramenten qu'èi pas counseia de manja de grano de vesso, que soun empouisounanto e dounon uno malautié néuroulougico, lou latirisme (presènci d'ODAP).

Port : Erbo
Taio : 20 à 60 cm
Fueio : coumpausado
Tipe bioulougico : Teroufite
Cicle bioulougico : Planto de l'an

Gènre : Vicia
Famiho : Fabaceae
Famiho classico : Leguminosae

Ordre : Fabales

Coulour de la flour : Jauno
Petalo : irreguliero
Ø (o loungour) flour : 18 à 25 mm
Flourido : Printèms - Estiéu

Sòu : Ca
Autour basso e auto : 0 à 1200 m
Aparado : Noun
Mai à juliet

Liò : Prado - Ermas - Tepiero seco - Baragno
Estànci : Termoumediterran à Coulinen
Couroulougi : Eurimediterrano
Ref. sc. : Vicia lutea L., 1753

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.